Шупашкарти «Экспо-Контур» суту-илỹпе выставка комплексĕнче регионсем хушшинчи «Çĕр улми — 2022» куравра çынсем çĕр улми вăрлăхĕ те туянма пултарнă.
Куравăн пĕрремĕш кунĕнче кăна 35 тонна вăрлăх сутнă. Суту-илĕве хамăр патăмăрти тата ют çĕршывра хатĕрлесе кăларнă «иккĕмĕш çăкăрăн» 26 сортне тăратнă.
Комсомольски районĕнчи «Слава картофелю» агрофирма вăрлăхлăх тата апат-çимĕçре усă курмалли çĕр улми туса илессипе аталанать, çак ĕçре ыттисене те пулăшать. Курава 5 сорт илсе килнĕ: «гала», «гулливер», «коломба», «метеор», «ред скарлетт». Чăваш ял хуçалăх ăслăлăх-тĕпчев институчĕ юлашки вăхăтра «аван» сортпа та ĕçлет. Ăна халăх кăмăлласа йышăннă, хакне пăхмасăрах хăвăрт туянса пĕтернĕ. «Винета», «вымпел», «жуковский ранний», «кураж» сортсем те çынсене кăсăклантарнă.
