Паян кашни хуçалăхрах вырма ĕçĕсем хĕрỹ пыраççĕ. Çанталăк уяр та типĕ тăнă вăхăтра ĕçченсем çитĕннĕ тыр-пула тăкаксăр пухса кĕртме, кашни сехетпе туллин усă курма васкаççĕ.
Вырма ĕçĕсем тата кĕр тыррисене акас ĕç мĕнле пынипе паллашас тĕллевпе Петр Скворцов ертсе пыракан «Прогресс» хуçалăхра пултăмăр. «Агрос» тата «Дон-1500» комбайнсем сарă уйра пĕр тикĕссĕн ĕçлени кăмăла çĕклерĕ. Валерий Куприянов, Сергей Муллин, Анатолий Афанасьев, Виталий Дмитриев, Дмитрий Марков, Петр Колсанов комбайнерсем ку ĕçре çамрăксем мар — паха опыт пухнăскерсем. Владимир Воронцовпа Леонид Иванов КСУ-1 агрегатпа тырра вырса паккуса хываççĕ.
— 2146 гектар çинче çитĕннĕ пĕрчĕллĕ тата пăрçа йышши культурăсене паянхи кун тĕлне 1719 гектартан 70 пин центнер çапса тĕшĕлерĕмĕр, — кăмăллăн пĕлтерет Александр Владимиров тĕп агроном.
Кунта чылай çул ĕнтĕ элита вăрлăхсемпе анлăн усă кураççĕ. Агротехника йĕркисене тĕплĕн пурнăçланăран, пусă çаврăнăшне çирĕп пăхăннăран тухăçлă тыр-пул пухса илни куç кĕрет.
Вырма вăхăтĕнче ĕç кал-кал пыни водительсемпе механизаторсенчен те нумай килет. Николай Романов, Владимир Соловьев, Александр Егоров, Алексей Колсанов, Алексей Мамонтов, Валерий Выйгетов водительсем çапса тĕшĕленĕ тырра йĕтеме вăхăтлă турттарса тăраççĕ. Тырра алласа сортлакан ĕçченсем те хăйсен тивĕçĕсене тỹрĕ кăмăлпа пурнăçлаççĕ.
Ĕçченсене куллен вĕри апатпа тивĕçтерессине те йĕркеленĕ. Ирина Борисова, Любовь Хушкина, Ольга Филимонова поварсем — хирте кĕтнĕ çынсем. Вĕсем пĕçерекен техĕмлĕ апатпа кашниех кăмăллă.
Геннадий Куприяновпа Александр Антонов механизаторсем кĕрхи çĕртме сухи тăвассипе тимлеççĕ — паянхи кун тĕлне 305 га пурнăçланă. Кĕр тыррисене акма 1000 га çĕр (планпа 1200 гектар пăхса хăварнă) хатĕрленĕ.
«Прогрессем» кĕрхи культурăсене акассипе те ăнăçлă ĕçлеççĕ. Кунта Валерий Охотин механизатор, унăн пулăшуçи Геннадий Николаев, Юрий Николаев водитель пысăк тăрăшулăх кăтартаççĕ. Ĕнерхи вăхăт тĕлне 397 гектар çинче акса хăварнă.
Хуçалăхра выльăхсене хĕл каçма апат хатĕрлесси тивĕçлĕ шайра: 292 тонна утă, 9500 тонна сенаж хатĕрленĕ.
Елена ПЕТРОВА.
Автор сăн ỹкерчĕкĕсем.
