Елчĕк муниципалитет округĕн пуçлăхĕ Леонард Левый апрелĕн 21-23-мĕшĕсенче Мускавра пулса иртнĕ Пĕтĕм Раççейри «Пĕчĕк çĕршыв — Раççей вăйĕ» ятпа иртнĕ муниципалитет форумне хутшăннă.
— Çак паллă пĕлтерĕшлĕ мероприятин тĕп тĕллевĕ — çĕршыври пур муниципалитет пĕрлешĕвĕсене пĕр ушкăна чăмăртасси, муниципалитет службин ят-сумне ỹстересси пулса тăрать. Маншăн вăл уйрăмах пĕлтерĕшлĕ. Мĕншĕн тесен общество, патшалăх аталанăвĕшĕн вăй хуни вăл — ахаль ĕç анчах мар, вăл — чун ыйтни тата тăван округра пурăнакан кашни çын умĕнче пысăк яваплăх илни те, — тесе пĕлтернĕ Леонард Васильевич хăйĕн телеграм-каналĕнче.
