2027 çулта Тутарстанра йăх-несĕл тымарне искусствăлла интеллект пулăшăвĕпе тĕпчемелли интернет-портала хута яма планлаççĕ. Проекта 93 яла кĕртнĕ те ĕнтĕ.
Республикăн архив ĕçĕсен патшалăх комитечĕ «Ядкэр» проектпа килĕшỹллĕн пĕр IT-компанипе ятарлă платформа хатĕрленĕ. Унта метрика, ревизи кĕнекисенчи тата халăх çыравĕсен даннăйĕсене кĕртеççĕ. Унтан искусствăлла интеллект йăх тымарĕсене тĕпчеме пулăшĕ. Хальлĕхе специалистсем ялсемпе ĕçлеççĕ. 2027 çулта вара патшалăх пулăшăвĕсен порталĕ урлă ку системăна кĕме ирĕк парĕç. Çапла майпа граждансенчен хуть те кам хăйĕн йăх-несĕл тымарне унта тỹлевсĕрех тĕпчеме пултарĕ.
