Футбол вăййине ачасем кĕçĕнрен кăмăллаççĕ. Вăхăт иртнĕ май вĕсем вăйă йĕркисене ăнкарса ăсталăх çулĕпе ỹссе пыраççĕ. Кунта вĕсене ашшĕ-амăшĕ хавхалантарса пыни пысăк вырăн йышăнать.
Иртнĕ эрнекун округ центрĕнчи стадион футболла вылякансене (2010-2021 çулсенче çуралнă) тата вĕсен ашшĕ-амăшне, тренерсене пуçтарчĕ. Çак кун округра Пĕтĕм Раççей шайĕнчи «Интер» футбол академийĕн филиалне уçрĕç. Пуçтарăннисене чи малтанах асăннă академин тĕп директорĕ Антон Гладышев саламларĕ.
— «Интер» академин филиалĕ паян Раççейĕн 9 регионĕнче уçăлнă. 35 филиала çамрăк футболистсем кăмăлласа çỹренипе пĕрле ăсталăхне те туптаççĕ. Пурĕ 350 ытла ăмăртура çĕнтерỹçĕпе призер ятне илнĕ академин Елчĕкри филиалĕ те ăста футболистсене хатĕрлессе шанса тăратпăр, — палăртрĕ Антон Александрович.
Салам сăмахĕсем çумне Елчĕк округĕн пуçлăхĕн çумĕ Владимир Николаев хутшăнчĕ. Филиалăн ялавне тĕп директор аллинчен йышăннă май вăл ачасене спортăн çак тĕсĕнче ăнăçусемпе çитĕнỹсем сунчĕ.
