2-мĕш турта — çитĕн
Елчĕкри стадион-площадкăра Чăваш Ен футбол чемпионачĕн иккĕмĕш турĕ иртнĕ.
«Яльчики» команда республикăри турнирта чылай çул вылякан Тăвай районĕнчи «Турмыши» футболисчĕсене йышăннă. Çапах та кил хуçисене «стенасем те пулăшни» палăрнах: вĕсем хăнасене 3:0 шутпа çĕнтернĕ. Мечĕксене Николай Николаев (Акчел), Дмитрий Волков тата Даниил Трофимов (Хăвăлçырма) тапса кĕртнĕ.
Июнĕн 5-мĕшĕнче Елчĕксем Канаш хулинче вырăнти командăпа тĕл пулаççĕ.
Пуласлăхĕ пысăк
Елчĕкри вăтам шкулта 1-мĕш класра вĕренекен Михаил Миллин спорт картлашкипе шав çỹлелле хăпарать.
Маларахри ăмăртусенче вăл ытларах призерсен йышĕнче пулнă пулсан, халĕ вара час-часах «ылтăна» та алла илет. Çакна вăл Шупашкар районĕнчи Çĕнĕ Тутаркассинче иртнĕ ирĕклĕ майпа кĕрешекенсен уçă турнирĕнче çирĕплетнĕ. Сергей Александров тренер вĕренекенĕ 23 килограма çитичченхи виçере шанчăклăнах çĕнтерỹçĕ пулса тăнă.
