Ыйтусем çине Чăваш Республикин Çар комиссарĕ Б.Холиков хуравлать:
— Бахтиер Махмаджонович, тỹрех ыйтар-ха, кăçал пирĕн республикăран миçе каччă çар ретне тăрĕ?
— Раççей Президенчĕн Указĕпе килĕшỹллĕн кĕрхи призыв октябрĕн 1-мĕшĕнчен пуçласа декабрĕн 31-мĕшĕччен пырать. Палăртса хăварар, çуркуннехи призыв та, кĕрхи те ятарлă çар операцине ирттернипе ниепле те çыхăнман. Кăçалхи кĕркунне çар службине пурнăçлама Чăваш Республикинчен 1 пинрен кăшт ытларах салтака яма палăртнă. Иртнĕ çуркуннехи призывпа танлаштарсан, ку чылай сахалрах.
— Эсир призыв ятарлă çар операцине ирттернипе çыхăнман терĕр. Çапах ашшĕ-амăшĕ ывăлне ятарлă çар операцине е чикĕ çывăхĕнчи облаçсене ярасран шикленет. Хăрама кирлех-ши вĕсен?
— Призывпа çар ретне тăнă каччăсене ятарлă çар операцине ямаççĕ — служба вĕçленсен вĕсем тăван тăрăха таврăнаççĕ.
— Пирĕн салтаксем ытларах хăш тăрăхри çар чаçĕсенче службăра тăраççĕ?
Пирĕн призывниксем Раççейĕн мĕн пур регионĕнчи çар чаçĕсенче служба тивĕçне пурнăçлаççĕ. Çав шутра — Росгвардин çар чаçĕсенче те. Чылай призывника çар комиссариатĕнчен вĕренỹ подразделенийĕсене ярĕç, унта вĕсем хальхи йышши çар техникине хăнăхĕç, çар-учет специальноçне алла илĕç. Паллах, яшсене Президент полкне ăсатас йăла пăрахăçланмĕ. Унашкаллисем хальхинче те пулĕç.
(Хамăр корр.).
