Çĕнтерỹ списокне уçнă
Ирĕклĕ майпа кĕрешессипе пĕлтĕр Раççейри нумай хулари турнирта палăрнă Михаил Миллин кăçалхи çĕнтерỹсен списокне уçнă.
Ăнăçнă вырăн — Волгоград облаçĕнчи Волжск хули. Унти уçă турнира тĕрлĕ регионтан хутшăннă спортсменсем. Елчĕк ачи малтанхи тĕл пулусенче Юсуф Эдильгериев чеченеца, Хамзат Калоев ингуша пĕр пек шутпа (3:0) çĕнтернĕ. Ăмăртăвăн ку пайĕ уншăн хатĕрленỹ тапхăрĕ кăна пулнă-ши? Финалта вăл Волгоград хулинчи Платон Панфиловпа Кирилл Павлеченкăна иккĕшне те 10:0 (!) шутпа парăнтарса ним шанăçсăр хăварнă.
«Тăваттăшĕн финалĕнче»
Республикăра 2007-2008 çулсенче çуралнă арçын ачасен хушшинче «тăваттăшĕн финалĕ» ятпа йĕркеленĕ «Ылтăн шайба» турнирĕ пуçланнă. Унта пĕтĕмпе хуласен 4, ялсен 7 команди хутшăнма тивĕçнĕ.
«В» ушкăна, шăпа янă тăрăх, Елчĕксемпе пĕрле тỹрех Шупашкар хулин виçĕ команди кĕнĕ. Вăйăсем çивĕч иртни çакăнтан та курăнать: пирĕн хоккеистсем «Скала» командăна 4:3 шутпа, «Спартака» овертаймра çĕнтернĕ. Роберт Григорьев ертсе пыракан команда нарăсăн 20-мĕшĕнче малалла тупăшĕ. Финалта çĕнтерекенĕ вара Салават хулинче иртекен Раççей шайĕнчи турнирта вăй виçĕ.
Афганецсене асăнса
Аслă Елчĕкри хоккей площадкинче вăхăтсăр çĕре кĕнĕ ялти воин-интернационалистсене асăнса черетлĕ хоккей турнирне йĕркеленĕ.
Территори пайĕн администрацийĕ пуçарса янă турнирта округри çамрăксен виçĕ команди — Аслă Елчĕк, Патреккел, Лаш Таяпа спортсменĕсем вăй виçнĕ. Пĕтĕмлетỹ протоколне те çак йĕркепех çырăннă вĕсем. Коллективсене дипломсемпе медальсемсĕр пуçне асăнмалăх парнесемпе те чысланă.
