Юнкун Чăваш патшалăх оперăпа балет театрĕнче республикăри аграрисене професси уявĕ ячĕпе сумлă лару-тăрура чысланă. Унта округ администрацийĕн пуçлăхĕ Леонард Левый ертсе пынипе Елчĕк тăрăхĕн сумлă делегацийĕ те хутшăннă.
Ял хуçалăх отраслĕ Елчĕк муниципалитет округĕнчи экономика аталанăвĕнчи тĕп шăнăр пулса тăрать. Ĕçе тухăçлă йĕркелесе пыма пултарни, производствăн кашни участокне шанчăклă тата ăста ĕç кадрĕсемпе тивĕçтерни ĕç кăтартăвĕсенче уççăнах палăрать.
Уявра пирĕн аграрисем пысăк ят-сума тивĕçнĕ. Юрий Викентьев ертсе пыракан «Сатурн» ял хуçалăх производство кооперативĕ «Пĕрчĕллĕ тата пăрçа йышши культурăсенчен чи пысăк тухăç илнĕшĕн» номинацире пĕрремĕш вырăн йышăннă.
Республика Пуçлăхĕ Олег Николаев çав кунах уйрăм тĕл пулура ĕçре пысăк çитĕнỹсемпе палăрнисене патшалăх наградисене парса чысланă. Çак йышра «Комбайн» ял хуçалăх производство кооперативĕнчи Антонина Соловьева та пур. Экономика тата финанс ĕçĕ-хĕлĕнче нумай çул ăнăçлă ĕçленĕшĕн ăна «Чăваш Республикин тава тивĕçлĕ экономисчĕ» хисеплĕ ятпа чысланă.
