Елчĕк районĕнчи библиотекăн краеведени фончĕ çак кунсенче вăрах кĕтнĕ кĕнекепе – Чăваш Республикин агропромышленность комплексĕн энциклопедийĕпе пуянланчĕ.
Энциклопедире республикăн тĕрлĕ çулсенчи ял хуçалăх тата унпа тачă çыхăнури отрасльсен аталанăвне çутатакан хыпарсем. 5450 хайлавран 4890-шĕ – биографи, 560-шĕ – тематика статйисем. Кунта республика ертÿлĕхĕнчен пуçласа патшалăх органĕсенче, район, колхоз тата совхоз ертÿçинче, бригадирта, ферма заведующийĕнче, ветеринарта, колхозра тăрăшнă ĕçченсем, преподавательсем, журналист-аграрниксем – ял хуçалăх аталанăвне тивĕçлĕ тÿпе хывнă кашни çын вырăн тупнă. Елчĕк тăрăхĕн паллă çыннисен хушамачĕсем те йышлă кĕнекере: Анастасия Абдулкина, Вера Агеева, Иван Денисов, Николай Миллин, Петр Миллин, Иван Михайловский, Иван Никитин, Федор Петрянкин тата ыттисем те.
Энциклопедие Чăваш Республикин АПК ветеранĕсен пĕрлĕхĕн пуçарăвĕпе кăларнă. Ăна хатĕрленĕ автор – СССР журналистсен союзĕн членĕ Алексей Леонтьев, редакторĕ – Чăваш Республикин культурăн тава тивĕçлĕ ĕçченĕ Римма Игнатьева.
Чăваш Республикин ял хуçалăх министрĕ Сергей Артамонов вырăнти АПКна аталантарассинче ял хуçалăх ветеранĕсен тÿпи пысăк пулнине палăртнă май энциклопедие пысăк хак панă.
