Округ центрĕнчен аякра вырнаçнă Каркалар ялĕнче клуб тахçанах çук ĕнтĕ.
Çапах та çынсен пушă вăхăта усăллă ирттерес, пĕрле пуçтарăнса калаçас туртăм юлнах. Халĕ ĕнтĕ ĕмĕтленни пурнăçланнă: фельдшерпа акушер пункчĕн 50 тăваткал метра яхăн йышăнакан пĕр пỹлĕмĕ ял çыннисен «аллинче». Унта ушкăнпа юрă-ташă вĕренме, ал ĕçĕ тума, хаçат-журнал вулама майсем çителĕклĕ.
Пỹлĕме уçма округ пуçлăхĕ Леонард Левый, округри Депутатсен пухăвĕн депутачĕ Вадим Чернов, «Авангард» ООО представителĕ Хамид Гиматдинов хутшăннă.
